Azərbaycanlılar Sirat körpüsündə
İslam peyğəmbəri buyurub: "Öz zəhməti ilə çörək yeyən şəxs, Sirat körpüsündən ildırım kimi keçəcək".
Belə çıxır ki, Azərbaycanın müsəlman oliqarxları, yəni dövlət və hökumət başçılarının işi o vaxt çox qəliz olacaq. Təbii ki, Qurana, peyğəmbərə kim inanırsa, ona da inanar ki, ölkəni çapıb-talayan bu məmurların hamısı ucdantutma o dünyada bir başa qıl körpüsünün üstündən qır qazanına yumbalanacaqlar. Bu dünyada nə qədər usta kəndirbaz, peşəkar sirk ustası, dahi gözbağlayıcı olsalar da, Sirat körpüsünün üstündə bu xüsusi məharətlərindən yararlana bilməyəcəklər. Bizim mömin millətimiz onu da bilir ki, Sirat körpüsünün üstündən kövrək addımları atmamışdan qabaq kim olursan ol, nəçi olursan ol, kimin qohumu-qardaşı, oğlu-qızı olursan ol - adama təhlükəsizlik kəndirindən istifadə eləməyə qətiyyən icazə verilmir. Bəri başdan onu da bilmək lazımdı ki, bu körpünün sütunları üstündə körpünü kimin sərəncamıyla salınması haqda hansısa lövhə vurulmasa belə, hamıya (söhbət 15 santimetr yuxarıda qeyd elədiyim kimi, təbii ki, inanclı insanlarımızdan gedir - P.) müəllifin Allah olduğu gün kimi aydındı və deməli, körpünün tikintisində yarıbayarı yeyinti faktının olmaması da bəllidi. Belə çıxır ki, bu körpü həm də halal körpüdü. Paytaxtımızda ildırım sürətiylə körpülər salıb, üstündən də ildırım kimi keçənlər orda belə məharətli ola bilməyəcəklər.
Onda qarşıya bizim mömin insanlarımıza, möhtərəm din xadimlərimizə, mollalara, dərvişlərə, müctəhidlərə, bütün Qafqazın şeyxinə, kəsəsi alnı möhürə dəyən hamıya veriləcək bəzi suallar çıxır. Məsələn, adam fikirləşir ki, Siratın üstündən keçərkən əbədi qəzaya uğrayacaq bu hökumət başçılarına inanclı insanların boyun əyməsini, itaət göstərməsini, lap yeri gələndə onlara seçkidə səs verməyə çağırmasını, mütilik nümayiş elətdirmələrini necə anlamaq olar? Hətta Müdafiə nazirinin "jurnalist həbsxanası" adlanan ölkənin çox-çox möhtərəm, adı kavur təşkilatlarının siyahılarında iki il dalbadal "yırtıcılar" siyahısında özünə yer alan hörmətli prezidenti şəxsi heyyət adından namizəd göstərməsi belə, bunun yanında palatka toyuna getməlidi. Ancaq alnını möhürə vurub həzrəti Məhəmmədi Allahın son və ilk elçisi, onun gətirdiyi Kitabı kamil sayıb qəbul eləyən adamların bu hərəkətini, qır qazanında bişəcəklərinə şübhə eləmədikləri şəxslərin ayağına payəndaz olmalarını necə anlayasan - and olsun peyğəmbərin gül cəmalına ki, mən qavraya bilmirəm. Yəni, adam həm Qurana inanır, həm də Quranın Siratdan kəllə-mayallaq aşacağını müjdələdiyi adamlara boyun əyir, nəinki boyun əyir, hələ üstəlik, onları həvəslə boynuna da mindirib ayaqlarınndan marçamurçla öpür.
İndi mən dindən başı çıxan neytral ekspertlərdən soruşmaq istəyirəm ki, bəs belə adamlara müsəlman demək olarmı? Bəs belə adamlar Siratdan keçəndə o boyunlarına mindirib bərk-bərk ayaqlarını qucaqladıqları adamlar cəhənnəmə yuvarlananda bu möminlər də onlarla birgə aşağı diyirlənəcəklər, ya üzü cənnətə vəsiqə qazanacaqlar?
Əlbəttə, millətimizin bu mömin və itaətkarlığı sevən kəsimi deyə bilər ki, bəs sən bilmirsənmi ki, əziz İslam peyğəmbərindən (s) sərt bir xəbərdarlıq da vardır ki: "Öz ailəsinin xərcini təmin etməyən kəs məlundur, məlun!".
Və biz də ailəmizin xərcini alayı cür təmin eləyə bilmədiyimizdən itaət yolu seçmişik, boynunda kimisə gəzdirmək də elə öz zəhmətilə çörək yeməkdi. Allah özü görür ki, bu məmləkətdə ayrı yol yoxdu...
Nə bilim, vallah! Bir yandan baxanda, bu da arqumentdi. Allah özü görürsə, daha neynəmək olar? Ancaq indi mən bilmirəm, bu sualın cavabını Allahdan necə soruşum?
Allah imanınızı kamil eləsin, möminlər. Amin!
Açar sözlər: sirat-körpü
Yazar:
PARVİZ | Tarix: May 19, 2008 22:14 |
Publisistika |
| Baxış sayı: 240